បេសកកម្មតាមបណ្តាខេត្តរបស់ឯកឧត្តម ហ៊ុន ម៉ានី បានធ្វើដំណើរមកដល់ខេត្តឧត្តរមានជ័យនាថ្ងៃទី១៩ ខែកុម្ភៈ ឆ្នាំ២០២២។
នារសៀលថ្ងៃដដែលនេះ ក្នុងពិធីសំណេះសំណាលជាមួយរចនាសម្ព័ន្ធគណៈចលនាមហាជនខេត្តឧត្តរមានជ័យ ឯកឧត្តម ហ៊ុន ម៉ានី អគ្គលេខាធិការនៃអគ្គលេខាធិការដ្ឋានគណៈចលនាមហាជន នៃគណៈកម្មាធិការកណ្ដាលគណបក្សប្រជាជនកម្ពុជា បានលើកឡើងចំពោះមុខសកម្មជនគណបក្សប្រជាជនជាច្រើនរូបថា “គណបក្សប្រជាជនកម្ពុជានៅតែជាជម្រើសតែមួយគត់ សម្រាប់ប្រជាជនកម្ពុជា ព្រោះគណបក្សប្រជាជនមានប្រភពពីប្រជាជន ជារបស់ប្រជាជន និង ដើម្បីប្រជាជន។” ការលើកឡើងបែបនេះ គឺចំពេលដែលប្រទេសកម្ពុជាកំពុងទទួលបានការកោតសរសើរខ្លាំងចំពោះការគ្រប់គ្រងការរីករាលដាលជំងឺកូវីដ១៩ បានល្អប្រសើរទាំងក្នុងប្រទេស កម្រិតតំបន់ និងអន្តរជាតិ។ ក្នុងដំណាក់កាលនៃការលំបាកបែបនេះ ថ្នាក់ដឹកនាំគ្រប់ជាន់ថ្នាក់នៃគណបក្សប្រជាជនកម្ពុជាតែងតែនៅកៀកក្បែរប្រជាពលរដ្ឋ ស្គាល់ទុក្ខធុរ:គ្រប់កាលៈទេសៈទាំងអស់។ ឯកឧត្តមបានបន្ថែមប្រកបដោយភាពជឿជាក់ថា “គ្រប់ពេលដែលមានការលំបាក ឬពេលប្រទេសជាតិមានវិបត្តិ មន្ត្រីនៃគណបក្សប្រជាជនកម្ពុជា តែងតែមានវត្តមាននៅជាមួយប្រជាជនកម្ពុជាជានិច្ច។”
ក្នុងជំនួបនារសៀលនេះ ឯកឧត្តម ប៉ែន កុសល្យ ប្រធានគណបក្សប្រជាជនកម្ពុជាខេត្តឧត្តរមានជ័យ ក៏បានលើកឡើងក្នុងរបាយការណ៍របស់លោកដែលមានខ្លឹមសារថា៖ “នៅខេត្តឧត្តរមានជ័យឲ្យតែមានការខ្វះខាត មានបញ្ហា តែងតែមានមន្ត្រីគណបក្សប្រជាជនកម្ពុជា មិនថាជនរងគ្រោះមាននិន្នាការទៅខាងណាក៏ដោយ។ ឆ្លៀតក្នុងឱកាសនោះ ឯកឧត្តមបានថ្លែងអំណរគុណដល់មន្ត្រីរាជការ ក្រុមការងារទាំងអស់ដែលបានចុះជួយប្រជាពលរដ្ឋ រួមមានខ្យល់កន្ត្រាក់ ទឹកជំនន់ គ្រោះរាំងស្ងួត ឬផលលំបាកនានា មិនថាយប់ ឬថ្ងៃ ឬជនរងគ្រោះមាននិន្នាការនយោបាយខាងណាក៏ដោយ។ ឯកឧត្តមបានបន្ថែមយ៉ាងដូច្នេះថា“ស្មារតីបម្រើប្រជាជន ស្ថិតក្នុងចិត្តរបស់យើងខ្ញុំទាំងអស់គ្នាជានិច្ច”។
ស្របពេលដែលបេសកកម្មរបស់ឯកឧត្តម ហ៊ុន ម៉ានី បានមកដល់ភូមិសាស្ត្រខេត្តឧត្តរមានជ័យនេះ ដែលជាខេត្តស្ថិតជាប់បន្ទាត់ព្រំដែន ឯកឧត្តមក៏បានឆ្លៀតឱកាស កោតសរសើរ និងថ្លែងអំណរគុណដល់មន្តី្ររាជការ ក្រុមការងារមូលដ្ឋាន ក្នុងការគ្រប់គ្រង និងសម្របសម្រួលបងប្អូនកម្មករដែលវិលត្រឡប់មកពីប្រទេសជិតខាងក្នុងការធ្វើចត្តាឡីស័ក ឬជាជំនួយការផ្សេងៗ។ ឯកឧត្តមបានគូសបន្ថែមផងដែរថា “សកម្មភាពនៃការលះបង់របស់មន្ត្រីរាជការដែលជាសមាជិកបក្សទាំងអស់គ្នាពិតជាហត់នឿយណាស់ ម្យ៉ាងត្រូវប្រឈមមុខជាមួយហានិភ័យផង ម្យ៉ាងត្រូវប្រឈមជាមួយបញ្ហានានាជាច្រើនផ្សេងៗទៀតដែលជួបប្រទះផង ទាំងបញ្ហាផ្ទាល់ខ្លួន និងទំនួលខុសត្រូវដទៃទៀតផង តែមន្រ្តីមូលដ្ឋាននៅតែបន្តពុះពារបំពេញការងារឱ្យសម្រេចបានប្រកបដោយប្រសិទ្ធិភាពខ្ពស់។”
