ភ្នំពេញ៖បុរសជនជាតិចិនម្នាក់ បានស្ទុះទៅវាយចំកណ្តាលមុខបុរសម្នាក់ ដែលជាបុគ្គលិកផ្សារទំនើប Soho Mall ព្រោះតែខឹងនឹងបុគ្គលិកផ្សារទំនើបនោះ ទៅហាមឃាត់មិនឱ្យបន្ទោរបង់លើបង្គោលភ្លើង ក្នុងបរិវេណផ្សារទំនើប។
ហេតុការណ៍នេះ បានកើតឡើងកាលពីម៉ោង ១១ និង២៥នាទីយប់ថ្ងៃទី៣ ខែមេសា ឆ្នាំ២០២៣ ស្ថិតនៅចំណុចមុខបរិវេណ អគារផ្សារទំនើបសូហូ (SOHO Mall) ស្ថិតនៅផ្លូវជាប់ស្ថានទូតរុស្សី កែងផ្លូវរដ្ឋសភាជាតិ ក្នុងសង្កាត់ទន្លេ បាសាក់ ខណ្ឌចំការមន រាជធានីភ្នំពេញ។
ប្រភពព័ត៍មាននៅកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនជាតិចិនប្រុសស្រី ២នាក់ រួមនឹងជនជាតិវៀតណាម ៣នាក់ទៀត ទើបតែដើរចេញពីកន្លែងផឹកស៊ីមួយកន្លែង មកដល់ចំណុចកើតហេតុ រួចឈរបន្ទោរបង់នៅចំណុចបង្គោលភ្លើង លើចិញ្ចើមផ្លូវ មុខបរិវេណផ្សារទំនើប Soho Mall ឃើញដូច្នេះ ជនរងគ្រោះ បានដើរទៅនិយាយប្រាប់ បុរសជនជាតិចិន ខាងលើនោះថា No No! កឺកឺ! និងធ្វើកាយវិការហាមមិនឱ្យនោម ដាក់បង្គោលភ្លើងនោះទឹ។
ស្រាប់តែភ្លាមនោះ បុរសជនជាតិចិនដែលជា(ជនដៃដល់) ទំនងស្រវឹងផង ក៏បានដើរសំដៅមកវាយបុគ្គលិកផ្សារទំនើប Soho Mall រួចបានធ្វើសកម្មភាពវាយជនរងគ្រោះចំកណ្ដាលមុខជាច្រើនដៃ និងវាយលើដងខ្លួន ឃើញដូច្នេះបុគ្គលិកម្នាក់ទៀត ក៏ចូលទៅជួយឃាត់ បង្កការភ្ញាក់ផ្អើលដល់សន្តិសុខផ្សារទំនើបSoho MAll និងកម្លាំងល្បាតកងរាជអាវុធហត្ថ ខណ្ឌចំការមន ចុះមកជួយអន្តរាគមន៍ ឃាត់បុរសជនជាតិចិន ខាងលើ ដើម្បីសួរនាំរកមូលហេតុ តែបែរជាបុរសជនជាតិចិននោះ ប្រតាយប្រតប់ ជាមួយកម្លាំងអាវុធហត្ថ ទើបកម្លាំងអាវុធហត្ថ ធ្វើការ ឃាត់ខ្លួន បញ្ជូនទៅសាកសួរ នៅមូលដ្ឋានកងរាជអាវុធហត្ថ ខណ្ឌចំការមន និងនាំជនរងគ្រោះទៅដាក់ពាក្យបណ្ដឹង ដើម្បីចាត់ការតាមនីតិវិធី៕
